Şəki Regional Mədəniyyət İdarəsindən daha bir ŞİKAYƏT - FOTOLAR
Bu fikirləri Oxu.Az-a müraciət edən M. F. Axundzadə adına Şəki şəhər Mədəniyyət Mərkəzinin bədii rəhbəri Rəşad Rüstəmov deyib. Şəki Regional Mədəniyyət İdarəsinin müvəqqəti rəhbəri Aqaəli Cəlilovdan şikayətçi olan Rəşad Rüstəmov həmin şəxsin onu intihar həddinə çatdırdığını vurğulayıb:
“Məni təhqir edirdilər ki, onlara cavab verim. Haqsızlığa dözmədiyimi görüb, məni əsəbləşdirib, səsimi yazaraq, Şəki Regional Mədəniyyət İdarəsinin məsul işçilərinə atmışdılar. Dəfələrlə bütün işçi heyətinin qaşısında məni alçaldaraq, şəxsiyyətimə qarşı qeyri-etik sözlərlə təhqir ediblər. Bir insan sevərək gördüyü, bütün həyatını həsr etdiyi işin belə alçaldılmasına və çəkdiyi zəhmətin heçə sayılmasına nə qədər dözə bilər?
Mən üçüncü dərəcəli əliləm. Çalışdığım 27 il ərzində bütün iş yoldaşlarımla normal münasibətdə olmuşam və heç bir insanla hər hansı bir problemim olmayıb. Son illər isə nədənsə direktor Aqaəli Cəlilovun davamlı qərəzi ilə qarşılaşıram. Mərkəzin ikinci rəhbər işçisi olmağıma baxmayaraq, dəfələrlə aylıq və illik tədbirlərin planlaşdırılmasında, aylıq iş planlarının tərtib olunmasında mənimlə məsləhətləşmədən, məni bu proseslərdən uzaqlaşdırmağa çalışıblar.
Aqaəli Cəlilovun mənə qarşı qərəzi davam edir. Belə ki, sonuncu dəfə 26 aprel 2023-cü il tarixdə keçirilən Akademik Zərifə xanım Əliyevanın anadan olmasının 100 illiyinə həsr olunmuş “Gözündən nur verən həkim” adlı anım tədbirindən sonra idarə rəhbərinin mənə qarşı qərəzi pik həddə çatdı. Səbəb Aqaəli Cəlilovun gəlişini gözləmədən, tədbiri tam vaxtında başlamağım olub. Halbuki idarə rəhbərinin də tədbirə gələcəyi haqqında mənə heç bir məlumat verilməmişdi. O isə Mədəniyyət Mərkəzinə gəldiyi halda otağında oturub, tədbir keçirilən zala daxil olmayıb. Bundan 2 gün sonra aprelin 29-da keçirilən mədəniyyət işçilərinin seminar müşavirəsində Aqaəli Cəlilov məni aşağılayaraq, tədbirdə onu gözləmədiyim üçün “ailə tərbiyəsi görməyən” adlandırıb, o gələndə ayağa durmadığımı bəhanə gətirib, məni təhqir edib. Rəis mənim dəli olduğumu deyərək, işdən çıxma ərizəsi yazmağa təhrik edib. Mən isə bilərəkdən ərizədə təhqir edildiyimi, bu səbəbdən işimdən istefa verdiyimi vurğulamışam. Üstəlik, psixoloji cəhətdən tam sağlam olduğum haqqında rəsmi sənəd də almışam. Aqaəli Cəlilov isə yazdığım həmin ərizəni qəbul etməyib, kağızı əzişdirib, yerə atıb.
Sonrakı günlər işə getdikdə, mənə dedilər ki, artıq işə gəlmə, çünki çıxarılmısan. Halbuki mən heç bir ərizəyə qol çəkməmişəm, qəbul edilməyən ərizədən sonra heç nə yazmamışam. Dövlət Əmək Müfəttişliyi Xidmətinə (DƏMX) müraciət etdim, məsələ araşdırıldı və haqlı olduğum ortaya çıxdı. Mədəniyyət Mərkəzinin rəhbərliyi məni yenidən işə geri qaytardı. May ayı ərzində işləsəm də ayın əvvəli, DƏMX tapşırıq verənə qədərki bir neçə günlük maaşım tutuldu.
İyun ayından etibarən yenidən əmək müqaviləmə xitam verilib. Heç bir əsas gətirilmədən, işdən çıxarılmışam. Məsələ ilə bağlı yenidən DƏMX-ə və Mədəniyyət Nazirliyinə ayrı-ayrılıqda müraciət etdim. Hələ ki, məsələ araşdırılır, amma məni işə buraxmırlar. Şəki Regional Mədəniyyət İdarəsinin müvəqqəti rəisi Aqaəli Cəlilovun özbaşınalıqlarına son verilməsini və işimə bərpa olunmağı istəyirəm. Haqq-ədalətin yerini tapması vacibdir”.
Məsələ ilə əlaqədar Mədəniyyət Nazirliyinə sorğu ünvanladıq. Nazirlikdən bildirilib ki, bu barədə araşdırma aparılır.
Xatırladaq ki, bu Şəki Regional Mədəniyyət İdarəsinin rəhbəri Aqaəli Cəlilov haqqında redaksiyamıza daxil olan ilk şikayət deyil. Bundan öncə isə Şəki sakini, Mədəniyyət İdarəsinin tabeliyindəki klublardakı rəqs dərnəyinin rəhbəri Nurəli Ramazanovun müraciətini dərc etmişik. Nurəli Ramazanov da idarə rəisi Aqaəli Cəlilovun xüsusi tapşırığı ilə işə buraxılmadığını iddia edib.