Yevlax Rayon Mərkəzi Xəstəxanasında 15 İyun – Milli Qurtuluş Gününə həsr olunmuş tədbir keçirilib.

"Yevlax Rayon Mərkəzi Xəstəxanası" Publik Hüquqi Şəxsində 15 İyun – Milli Qurtuluş Gününə həsr olunmuş tədbir keçirilib.

Turkdunyasi.az xəbər verir ki, Yevlaxda 15 İyun – Milli Qurtuluş Gününə həsr olunmuş silsilə tədbirlər davam etdirilir. Növbəti tədbir Yevlax Rayon Mərkəzi Xəstəxanasında keçirilmişdir. "Konstitusiya və suverenlik ili çərçivəsində" 15 İyun – Milli Qurtuluş Gününə həsr olunmuş  tədbirdə Yevlax Şəhər İcra Hakimiyyəti başçısının müavini-İctimai siyasi və humanitar məsələlər şöbəsinin müdiri Elnarə Əzizova, Milli Məclisin deputatı İlham Məmmədov, Yeni Azərbaycan Partiyasının Yevlax Rayon Təşkilatının sədri Rafiq Əliyev, Yevlax Rayon Mərkəzi Xəstəxanası publik hüquqi şəxsin direktoru Fazil İsmayılov və Xəstəxananın əməkdaşları iştirak ediblər.
Tədbirdə çıxış edən Yevlax Şəhər İcra Hakimiyyəti başçısının müavini-İctimai siyasi və humanitar məsələlər şöbəsinin müdiri Elnarə Əzizova 15 iyun tarixinin Azərbaycan tarixindəki önəmli rolundan bəhs edərək dedi ki, Azərbaycan tarixində elə məqamlar olmuşdur ki, həmin məqamlar mühüm mərhələnin başlanğıcı kimi tariximizə həkk olunmuşdur. Belə məqamlardan biri də Ümummilli Lider Heydər Əliyevin 1993-cü ilin iyununda xilaskarlıq missiyası ilə yenidən hakimiyyətə qayıtması ilə tarixə düşən hadisədir. Həmçinin bildirdi ki, bu tarixi yaradan Azərbaycanın müstəqilliyinin qorunub saxlanılmasında, möhkəmlənməsində, inkişafında müstəsna rol oynayan, daim xalqına arxalanan Ulu Öndər Heydər Əliyevdir. Azərbaycan özünün əsl müstəqilliyini Ulu Öndər Heydər Əliyevin qayıdışından sonra əldə etdi. Məhz Ulu Öndərin zəngin siyasi təcrübəsi, yüksək idarəçilik bacarığı, vətənə və xalqına olan tükənməz sevgisi Azərbaycanın dövlət müstəqilliyini təhlükədən qurtardı. Danılmaz həqiqətdir ki, Qarabağ münaqişəsinin həll edilməsi uzun illər ərzində siyasi-diplomatik, hərbi strateji və iqtisadi müstəvilərdə görülən işlərin, uğurlu xarici siyasətin və beynəlxalq fəaliyyətin nəticəsidir. Azərbaycanın Müzəffər Ali Baş Komandanı, möhtərəm Prezident cənab İlham Əliyev Heydər Əliyev siyasətinin davam etdirilməsi nəticəsində bu misilsiz nailiyyətə imza atdı, milli qürur və ləyaqətin, tarixi ədalətin bərpasına nail oldu. Dövlət başçısının rəhbərliyi ilə Müzəffər Azərbaycan Ordusu 44 günlük Vətən müharibəsində düşmənə ağır zərbə vuraraq 30 illik işğala son qoydu, Azərbaycan xalqının, dədə-baba torpaqlarından didərgin düşmüş soydaşlarımızın torpaq həsrətini sona çatdırdı. 
Xalqımızın Ümummilli Lideri Heydər Əliyevin və qəhrəman şəhidlərimizin əziz xatirəsi bir dəqiqəlik sükutla yad edilmiş və Ulu Öndərin xilaskarlıq missiyasına həsr olunmuş videoçarx nümayiş etdirilmişdir.
Daha sonra tədbirdə çıxış edən Milli Məclisin deputatı İlham Məmmədov, YAP Yevlax Rayon Təşkilatının sədri Rafiq Əliyev Yevlax Rayon Mərkəzi Xəstəxanasının direktoru Fazil İsmayılov bu əlamətdar günün mahiyyəti ilə bağlı fikirlərini bölüşmüş, Milli Qurtuluş Gününün tarixi əhəmiyyəti və Azərbaycanın taleyində oynadığı roldan danışmışlar.