Şəhid jurnalist Sirac Abışovun doğum günüdür

Kəlbəcər rayonu, Susuzluq kəndində mina partlayışı nəticəsində şəhid olan jurnalist Sirac Abışovun avqustun 29-da doğum günüdür.

Turkdunyasi.az xatırladır ki, o, 1989-cu ildə Azərbaycan SSR-in Qubadlı şəhərində anadan olub.
O, Birinci Qarabağ müharibəsi zamanı ailəsi ilə birlikdə evlərindən didərgin düşüb, Sumqayıt şəhərində yaşamağa başlayıb.
Sirac Abışov operator kimi 2019-cu ildən Azərbaycan Dövlət Televiziyasında (AzTV) fəaliyyətə başlayıb.
O, 2021-ci il iyunun 4-də Kəlbəcər rayonu ərazisində yerləşən Susuzluq kəndi yaxınlığında baş verən partlayış zamanı şəhid olub. Onun nəşi iyunun 5-də yaşadığı Sumqayıt şəhərindəki Şəhidlər xiyabanında torpağa tapşırılıb.
Prezident İlham Əliyevin 14 iyun 2021-ci il tarixli sərəncamı ilə şəhid jurnalistimiz 3-cü dərəcəli "Vətənə xidmətə görə" ordeni ilə də təltif olunub. Səfərbərlik və Hərbi Xidmətə Çağırış üzrə Dövlət Xidmətinin rəisi Arzu Rəhimovun əmri ilə Sirac Abışov "Hərbi vətənpərvərlik tərbiyəsində xidmətlərə görə" medalı ilə təltif edilib.