yuxarı
Əbədi Qəhrəman”
Əbədi Qəhrəman”
Turkdunyasi.az xəbər verir ki, 28 oktyabr 2024-cü il tarixində Ağdam Muğam Mərkəzində Ağdam Rayon İcra Hakimiyyətinin ev sahibliyi və “Bir Təbəssüm” Vətənpərvərliyin Təbliğinə Yardım İctimai Birliyinin təşkilatçılığı ilə Vətən Müharibəsi şəhidi İsrafil Zülfüqar oğlu İbrahimovun xatirəsinə həsr olunmuş “Əbədi Qəhrəman” adlı layihənin təqdimat mərasimi baş tutmuşdur. Tədbirdə şəhidin ailə üzvləri, Rayon İcra Hakimiyyətinin başçısı Vaqif Həsənov, “Bir Təbəssüm” Vətənpərvərliyin Təbliğinə Yardım İctimai Birliyinin sədri İbrahim İbrahimli, Milli Məclisin deputatı Bəxtiyar Əliyev, aparatın əməkdaşları, Yeni Azərbaycan Partiyası Ağdam Rayon Təşkilatının sədri Mansur Quliyev, şəhid ailələri, qazilər və rayon ictimaiyyətinin nümayəndələri iştirak etmişlər.
Tədbir Dövlət Himninin səsləndirilməsi ilə başlamış, ölkəmizin ərazi bütövlüyü və suverenliyi uğrunda şəhid olmuş Vətən övladlarının və Ulu öndər Heydər Əliyevin əziz xatirəsinin bir dəqiqəlik sükutla yad edilməsi ilə davam etmişdir. Tədbirdə çıxış edən Rayon İcra Hakimiyətinin başçısı Vaqif Həsənov, “Bir Təbəssüm” Vətənpərvərliyin Təbliğinə Yardım İctimai Birliyinin sədri İbrahim İbrahimli və digər natiqlər iştirakçıları salamlamış, şəhid İsrafil İbrahimovun keçdiyi şərəfli döyüş yolundan, şəhid ailələrinə, qazilərə göstərilən dövlət qayğısından bəhs etmişlər.
Şəhidin ailə üzvləri çıxış edərək layihənin ərsəyə gəlməsində əməyi olanlara və tədbirin təşkilatçılarına minnətdarlıqlarını bildirmişlər. Çıxışlardan sonra şəhidin xatirəsinə həsr olunmuş qısametrajlı videoçarx tədbir iştirakçılarına nümayiş etdirilmişdir. Qeyd edək ki, Azərbaycan Ordusunun kiçik çavuşu olan İsrafil İbrahimov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan İkinci Qarabağ müharibəsi zamanı Cəbrayılın, Qubadlının və Laçının azadlığı uğrunda aparılan döyüşlərdə iştirak etmiş, oktyabrın 26-da Laçın rayonunun Səfiyan kəndi istiqamətində gedən döyüş əməliyyatlarında qəhrəmancasına şəhid olmuşdur.
ƏbədiQəhrəman Ağdam RiH BirTəbəssüm İbrahim İbrahimli
