İran Xəzər vasitəsilə gizli şəkildə Rusiyaya sursat tədarük edib

Britaniyanın “Sky News” telekanalı güc strukturlarındakı mənbəyə istinadən xəbər verib ki, İran gizli şəkildə Rusiyaya çoxlu sayda güllə, raket və minaatan mərmiləri verib.
Məlumata görə, yanvar ayında Xəzər dənizi üzərindən Rusiyaya iki yük gəmisi ilə İran limanından reaktiv yaylım atəşi sistemləri, minaatan və pulemyotlar üçün sursat göndərilib.
Mənbənin sözlərinə görə, Moskva çatdırılma pulunu nağd şəkildə ödəyib. Hazırda Tehran yeni sursat partiyası göndərməyi planlaşdırır.
“Yanvar ayında Rusiya bayrağı altında iki yük gəmisi İran limanından Xəzər dənizi üzərindən Rusiyaya üzərək, təxminən 100 milyon güllə və 300 minə yaxın mərmi daşıyıb”, - deyə telekanal bildirib.
Silahların ötürülməsində quru yük daşıyıcıları “Musa Jalil” və “Begey” adlı gəmilərin iştirak etdiyi iddia edilir.
Hərbi yardımın dəyərinin müstəqil qiymətləndirilməsi mümkün olmayıb, lakin ekspertlər hesab edirlər ki, bu, böyük məbləğdir.
Sky bildirir ki, İran bu yolla Rusiyaya Ukraynadakı münaqişə zonasında cəbhə xəttində ehtiyatının artırılmasına kömək edir.